اگرچہ تمام سبزیاں صحت کے لیے اہم ہیں، لیکن کچھ اقسام منفرد فوائد پیش کرتی ہیں۔ اگر آپ اپنی صحت کے بارے میں فکر مند ہیں تو اپنی خوراک میں پیاز شامل کرنے پر غور کریں۔ پیاز غذائیت سے انتہائی بھرپور ہے اور اس کے کئی فوائد ہیں، جن میں دل کی صحت میں بہتری، خون میں شوگر کا بہتر کنٹرول اور ہڈیوں کی کثافت میں اضافہ شامل ہے۔
پیاز میں مختلف وٹامنز، معدنیات اور پودے کے طاقت ور مرکبات ہوتے ہیں، جو کئی طریقوں سے صحت بہتر کرتے ہیں۔ درحقیقت، پیاز کی دواوں کی خصوصیات کو زمانہ قدیم سے پہچانا جاتا رہا ہے، جب وہ سر درد، دل کی بیماری اور منھ کے زخموں جیسی بیماریوں کے علاج کے لیے استعمال کی جاتی تھی۔
ایک درمیانی پیاز میں صرف 44 کیلوریز ہوتی ہیں، لیکن یہ وٹامنز، معدنیات اور فائبر کی کافی مقدار فراہم کرتی ہے۔ اس میں خاص طور پر وٹامن سی کی مقدار زیادہ ہوتی ہے، یہ ایک غذائیت ہے جو مدافعتی صحت، کولیجن کی پیداوار، ٹشوز کی مرمت اور آئرن جذب کرنے کو منظم کرتی ہے۔ وٹامن سی آپ کے جسم میں ایک طاقت ور اینٹی آکسیڈنٹ کے طور پر بھی کام کرتا ہے، جو آپ کے خلیات کو غیر مستحکم مالیکیولز کی وجہ سے ہونے والے نقصان سے بچاتا ہے ،جسے فری ریڈیکلز کہتے ہیں۔ پیاز بی وٹامنز سے بھی بھرپور ہوتی ہے، جن میں فولیٹ اور وٹامن بی 6 شامل ہیں۔ یہ میٹابولزم، خون کے سرخ خلیات کی پیداوار اور اعصابی افعال میں کلیدی کردار ادا کرتے ہیں۔ پیاز پوٹاشیم کا ایک اچھا ذریعہ ہے، ایک ایسا منرل جس کی بہت سے لوگوں میں کمی ہے۔ آئیے! پیاز کے صحت سے متعلق فوائد جانتے ہیں۔
گرمی کی شدت سے بچاو
گرمی کی شدت کم کرنے کے لیے پیاز کا استعمال مفید ثابت ہوتا ہے ،کیوں کہ اس میں پایا جانے والا کیمائی کمپاونڈ کوئیرسٹن ٹھنڈک کا احساس جگاتا اور لُو سے بچاو ممکن بناتا ہے۔ گرمیوں میں پیاز کو سلاد کے طور پر کچا کھایا جاسکتا ہے۔
اینٹی آکسیڈنٹ مرکبات
پیاز پلانٹ کیمیکلز بشمول فلیوونائڈز سے بھری ہوئی ہے، جن میں اینٹی آکسیڈنٹ اور اینٹی سوزش دونوں اثرات ہوتے ہیں۔ درحقیقت، پیاز میں 25 سے زیادہ مختلف فلیوونائڈز ہوتے ہیں ۔ پیاز میں سلفر پر مشتمل مرکبات بھی ہوتے ہیں، جو بعض کینسرز کے خلاف حفاظت فراہم کرتے ہیں۔ اگر باقاعدگی سے اور کافی مقدار میں پیاز کھائی جائے تو یہ مرکبات دائمی حالات جیسے کینسر اور ذیابطیس سے محفوظ رکھنے میں مدد کرسکتے ہیں۔
دل کی ممکنہ بہتر صحت
پیاز میں موجود فلیوونائڈز میں سے ایک، کوئیرسٹن، حفاظتی اینٹی آکسیڈنٹ اور سوزش کے اثرات رکھتا ہے اور یہ سوچا جاتا ہے کہ اس کے ساتھ ساتھ پیاز میں موجود دیگر فائدہ مند مرکبات، دل کے لیے مفید خصوصیات میں حصہ ڈال سکتے ہیں۔ مطالعات سے پتہ چلتا ہے کہ پیاز کھانے سے بلڈ پریشر کم کرنے، کولیسٹرول کی سطح کنٹرول کرنے اور سوزش کو کم کرکے دل کی بیماری کے خطرے کو کم کرنے میں مدد مل سکتی ہے۔
بلڈ شوگر کا کنٹرول
پیاز کھانے سے بلڈ شوگر کو کنٹرول کرنے میں مدد مل سکتی ہے، جو خاص طور پر ذیابطیس یا ممکنہ طور پر ذیابطیس کا شکار ہونے والے لوگوں کے لیے اہم ہے۔ ٹائپ 2 ذیابطیس والے 42 افراد میں ایک تحقیق نے یہ ثابت کیا کہ 3.5 اونس یا 100 گرام کچی سرخ پیاز کھانے سے چار گھنٹے بعد روزہ فاسٹنگ بلڈ شوگر کی سطح میں نمایاں کمی واقع ہوتی ہے۔ مزید برآں، متعدد جانوروں کے مطالعے سے یہ بات سامنے آئی ہے کہ پیاز کے استعمال سے خون میں شوگر کنٹرول میں فائدہ ہو سکتا ہے۔
پیاز میں پائے جانے والے مخصوص مرکبات، جیسے کوئیرسٹن اورسلفر مرکبات، بھی ذیابطیس کے انسداد کے اثرات رکھتے ہیں۔ مثال کے طور پر، کوئیرسٹن کو چھوٹی آنت، لبلبہ، اسکیلیٹل مسلز، چربی کے ٹشوز اور جگر کے خلیات کے ساتھ تعامل کرتے ہوئے دیکھا گیا ہے، تاکہ پورے جسم کے خون میں شکر کو کنٹرول کیا جا سکے۔
ہڈیوں کی مضبوطی
خوراک میں پیاز شامل کرنا ہڈیوں کی کثافت میں بہتری سے وابستہ ہے۔ یہ پیاز کی اینٹی آکسیڈنٹ خصوصیات کی وجہ سے ہوسکتا ہے، جو آکسیڈیٹیو تناو اور ہڈیوں میں ہونے والے نقصان کو کم کرتا ہے۔ ایک تحقیق میں بتایا گیا ہے کہ پیاز کا کثرت سے استعمال کولہے کے فریکچر کا خطرہ کم کرتا ہے۔ درمیانی عمر کی خواتین پر کی گئی ایک تحقیق میں بتایا گیا ہے کہ پیاز کے رس کے استعمال سے ہڈیوں کا نقصان کم ہوتا اور ہڈیوں کی کثافت میں بہتری آتی ہے۔
ہاضمہ کی بہتری
پیاز خاص طور پر غیر ہاضم فائبر سے بھرپور ہوتی ہے، جو آنتوں کی صحت کو برقرار رکھنے کے لیے ضروری ہے۔ اگرچہ ہم پری بائیوٹک فائبر کو ہضم نہیں کر سکتے، لیکن ہماری آنتوں میں رہنے والے بیکٹیریا اسے توانائی کے طور پر استعمال کرتے ہیں، تاکہ انہیں اپنی تعداد بڑھانے اور شارٹ چین فیٹی ایسڈز (SCFAs) کہلانے والی ضمنی مصنوعات پیدا کرنے میں مدد ملے۔ تحقیق سے پتہ چلتا ہے کہ یہ SCFAs آنتوں کی صحت اور سا لمیت کو برقرار رکھنے اور ہماری قوت مدافعت اور ہاضمے کے افعال کے لیے اہم ہیں۔
اینٹی بیکٹیریل
کھانسی، زکام اور نزلہ زکام سے نجات کے لیے پیاز کو قدیم ادویات میں استعمال کیا جاتا تھا۔ غذائی ماہرین کے مطابق فاسفورس، منرلز اور وٹامنز سے بھر پور پیاز میں وٹامن سی اور اینٹی آکسیڈنٹ کی بھاری مقدار پائی جاتی ہے، جس کے استعمال سے نہ صرف صحت بلکہ جِلد اور بالوں پر بھی حیران کُن اثرات مرتب ہوتے ہیں۔ پیاز کا استعمال متعدد وائرل اور انفیکشنز سے تحفظ فراہم کرتا ہے۔