حکیم لقمان رحمة اللہ علیہ کا نام تو بچپن سے ہی سنتے چلے آرہے ہیں کیوں کہ اللہ تعالیٰ نے ان کے نام سے قرآن کریم میں ایک سورت نازل فرمائی ہے۔ جس کی قیامت تک تلاوت ہوتی رہے گی ان شاء اللہ۔ لیکن بہت کم لوگ اس بات سے واقف ہیں کہ حضرت حکیم لقمان کون تھے ۔ اللہ تعالیٰ نے ان کے نسب ، خاندان اور زمانہ کے بارے میں تو اپنے کلام میں کوئی ذکر نہیں کیا ،لیکن ان کے حکیمانہ اقوال کا ذکر فرمایا ہے۔ تاہم قدیم تاریخ اس بات کی گواہی دیتی ہے کہ اس نام کا ایک شخص سرزمین عرب پر موجود تھا، البتہ اُس کی شخصیت اور نسب کے بارے میں اختلاف پایا جاتا ہے۔ ایک روایت کے مطابق وہ حضرت ایوب علیہ السلام کے بھانجے یا خالہ زاد بھائی، جب کہ دوسری روایت سے حضرت داؤد علیہ السلام کا ہم عصر ہونا معلوم ہوتا ہے۔ اکثر مؤرخین کی رائے ہے کہ حکیم لقمان رحمة اللہ علیہ افریقی النسل تھے اور عرب میں ان کی آمد بحیثیت غلام ہوئی تھی ۔ جمہور علماء کا اتفاق ہے کہ حکیم لقمان نبی نہیں تھے اور نہ ان پر وحی نازل ہوئی، کیوں کہ قرآن وحدیث میں کسی بھی جگہ کوئی ایسا اشارہ موجود نہیں ہے جو حکیم لقمان کے نبی یا رسول ہونے پر دلالت کرتا ہو۔ غرضیکہ اللہ تعالیٰ نے حکیم لقمان کو نبوت عطا نہیں کی، مگر حکمت و دانائی سے وافر حصہ دیا۔
روایات میں آتا ہے کہ آپ صورت و شکل کے اعتبار سے اچھے نہیں تھے، جیسا کہ مشہور تابعی حضرت سعید بن مسیب رحمة اللہ علیہ نے ایک حبشی سے کہا تھا کہ تو اس بات سے دل گیر نہ ہو کہ تو کالا حبشی ہے ، اس لیے کہ حبشیوں میں تین آدمی دنیا کے بہترین انسان ہوئے ہیں۔ حضرت بلال حبشی رضی اللہ عنہ، حضرت عمر فاروق رضی اللہ عنہ کا غلام مہجع اور حکیم لقمان رحمة اللہ علیہ۔
غرضیکہ حکیم لقمان کے حالات زندگی اور زمانہ میں اختلاف کے باوجود پوری دنیا ان کو ایک مشہور شخصیت تسلیم کرتی ہے۔ جاہلیت کے متعدد شعراء نے بھی ان کا تذکرہ کیا ہے۔ اللہ تعالیٰ نے سورہ لقمان میں حضرت حکیم لقمان رحمتہ اللہ علیہ کی ان قیمتی نصیحتوں کا ذکر فرمایا ہے جو انہوں نے اپنے بیٹے کو مخاطب کر کے بیان فرمائی تھیں۔یہ حکیمانہ اقوال اللہ تعالیٰ نے اس لیے قرآن کریم میں نقل کیے ہیں تا کہ قیامت تک آنے والے انسان ان سے فائدہ اٹھا کر، اپنی زندگی کو خوب سے خوب تر بنا سکیں اور ایک اچھا معاشرہ وجود میں آسکے۔
پہلی نصیحت شرک سے دوری
سب سے پہلی حکمت عقائد کی درستگی کے متعلق ہے۔ اے میرے بیٹے!اللہ کے ساتھ شرک نہ کرنا ۔ یقین جانو شرک بہت بڑا ظلم ہے۔ یعنی اللہ تعالیٰ ہی پوری کائنات کا خالق و مالک و رازق ہے اور اس کے ساتھ کسی غیر اللہ کو شریک عبادت نہ کرنا۔ اس دنیا میں اس سے بڑا ظلم نہیں ہوسکتا کہ اللہ تعالیٰ کی کسی مخلوق کو اس کے برابر ٹھہرایا جائے ۔ یہی وہ پیغام ہے جس کی دعوت تمام انبیاء ورسل نے دی ہے کہ ۔معبود حقیقی صرف اور صرف اللہ تعالیٰ ہے، وہی پیدا کرنے والا ، وہی رزق دینے والا ہے اور پوری دنیا کے نظام کو تنہا ہی چلانے والا ہے، اس کا کوئی شریک نہیں ہے۔ ہم سب اس کے بندے ہیں اور ہمیں صرف اسی کی عبادت کرنی چاہیے ۔ وہی مشکل کشا، حاجت روا اور ضرورتوں کو پورا کرنے والا ہے۔
دوسری نصیحتاللہ کا علم ہر چیز کو محیط ہے
حکیم لقمان کی دوسری نصیحت اپنے بیٹے کو یہ تھی کہ اس کا یقین رکھا جائے کہ آسمان وزمین اور اس کے اندر جو کچھ ہے اس کے ایک ایک ذرہ سے اللہ جل شانہ اچھی طرح واقف ہے، کوئی چیز بھی اس سے مخفی نہیں ہے اور اس پر اس کی قدرت بھی کامل ہے۔ کوئی چیز کتنی بھی چھوٹی سے چھوٹی ہو جو عام نظروں میں نہ آسکتی ہو، اسی طرح کوئی چیز کتنی ہی دور دراز ہو، اسی طرح کوئی چیز کتنے ہی اندھیروں اور پردوں میں ہو ،اللہ تعالیٰ کے علم و نظر سے نہیں چھپ سکتی۔ غرضیکہ ہم دنیا کے کسی بھی میدان میں ہوں، تجارت کر رہے ہوں ، درس و تدریس کی خدمات انجام دے رہے ہوں ، ملازمت کر رہے ہوں ، قوم وملت کی خدمت کر رہے ہوں، لیکن ہمیں ،ہمارے ماں باپ اور کائنات کو پیدا کرنے والا ہماری زندگی کے ایک ایک لمحہ سے پوری طرح واقف ہے اور ہمیں مرنے کے بعد اس کے سامنے کھڑے ہو کر زندگی کے ایک ایک پل کا حساب دینا ہے۔ اگر ہم نے کسی سے چھپ کر رشوت لی ہے یا کسی شخص پر ظلم کیا ہے یا کسی غریب کو ستایا ہے یا کسی کا حق مارا ہے تو ممکن ہے کہ ہم دنیا والوں سے بچ جائیں، لیکن اللہ تعالیٰ کی عدالت میں اندھیر نہیں ہے اور ہمیں اس کا ضرور حساب دینا ہوگا ۔
تیسری نصیحت نماز قائم کرنا
حکیم لقمان نے اپنے بیٹے کو نصیحت کرتے ہوئے یہ بھی فرمایا: بیٹا! نماز قائم کرو۔ نماز ایمان کے بعد اسلام کا اہم ترین رکن ہے۔ نماز خود اہم ہونے کے ساتھ وہ دوسرے اعمال کی درستگی کا ذریعہ بھی ہے، جیسا کہ ارشاد باری ہے: جو کتاب آپ پر وحی کی گئی ہے اسے پڑھیے اور نماز قائم کیجیے ، یقینا نماز بے حیائی اور برائی سے روکتی ہے ۔ (سورة العنکبوت:45) نماز میں اللہ تعالیٰ نے یہ خاصیت و تاثیر رکھی ہے کہ وہ نمازی کو گنا ہوں اور برائیوں سے روک دیتی ہے ،مگر ضروری ہے کہ اس پر پابندی سے عمل کیا جائے اور نماز کو اُن شرائط و آداب کے ساتھ پڑھا جائے جو نماز کی قبولیت کے لیے ضروری ہیں، جیسا کہ حدیث میں ہے کہ ایک شخص نبی اکرم صلی الله علیہ وسلمکی خدمت میں آیا اور کہا کہ فلاں شخص راتوں کو نماز پڑھتا ہے ،مگر دن میں چوری کرتا ہے تو نبی اکرم صلی الله علیہ وسلم نے فرمایا کہ اس کی نماز عنقریب اس کو اس برے کام سے روک دے گی ۔ (مسند احمد، صحیح ابن حبان) لہٰذا ہمیں نمازوں کا اہتمام کرنا چاہیے۔
چوتھی نصیحت اصلاح معاشرہ کے لیے کوشش کرنا
حکیم لقمان اپنے بیٹے کو نصیحت کرتے ہوئے آگے فرماتے ہیں : اپنی ذات سے اللہ اور اس کے رسول کی اطاعت کے ساتھ معاشرہ کی اصلاح کی کوشش کرتے رہنا ،یعنی اس بات کی فکر کرنا کہ سارے انسان اللہ کو مان کر، اللہ کی مان کر، زندگی گزارنے والے بن جائیں۔ امر بالمعروف اور نہی عن المنکر (اچھائیوں کا حکم کرنے اور برائیوں سے روکنے )کی ذمہ داری کو اللہ تعالیٰ نے قرآن کریم میں بار بار بیان کیا ہے۔ سورہ توبہ کی آیت نمبر71 میں اللہ تعالیٰ نے بیان فرمایا کہ ایمان والے مرد اور ایمان والی عورتیں ایک دوسرے کے معاون و مددگار ہیں، ان کے چار اوصاف ہیں:اچھائیوں کا حکم کرتے ہیں اور برائیوں سے روکتے ہیں۔ نماز قائم کرتے ہیں۔ زکوٰة ادا کرتے ہیں۔ اللہ اور اس کے رسول کی اطاعت کرتے ہیں ۔ یعنی جس طرح ہر مؤمن پر اللہ اور اس کے رسول کی اطاعت کرنا ،نماز قائم کرنا اور زکاة ادا کرنا (اگر مال پر زکاة فرض ہے) ضروری ہے، اس طرح اچھائیوں کا حکم کرنا اور برائیوں سے روکنا ہر ایمان والے کے لیے ضروری ہے، اگر چہ ہر شخص استطاعت کے مطابق ہی امر بالمعروف اور نہی عن المنکر کا مکلف ہے۔
پانچویں نصیحت حالات پر صبر کرنا
اپنے ساتھ دوسروں کی اصلاح کی کوشش کرنا ایسا عمل ہے کہ اس کی پابندی میں خاصی مشقت برداشت کرنی پڑتی ہے۔ اس پر ثابت قدم رہنا آسان نہیں ہے، خصوصاً امر بالمعروف اور نہی عن المنکر کی خدمت کا صلہ دنیا میں عموما ًعداوتوں اور مخالفتوں سے ملتا ہے، اس لیے حکیم لقمان نے اس کے ساتھ یہ وصیت بھی فرمائی:دین پر چلنے اور اس کو دوسروں تک پہنچانے میں جو مشکلات سامنے آئیں ان پر صبر کریں، جیسا کہ سورہٴ العصر میں اللہ تعالیٰ زمانے کی قسم کھا کر ارشاد فرماتا ہے کہ تمام انسان خسارے اور نقصان میں ہیں، مگر وہ لوگ جو اپنے اندر چار صفات پیدا کرلیں:ایمان لائیں ۔ نیک اعمال کریں۔ محض اپنی انفرادی اصلاح و فلاح پر قناعت نہ کریں، بلکہ امت کے تمام افراد کی بھی کام یابی کی فکر کریں۔ دین پر چلنے اور اس کو دوسروں تک پہنچانے میں جو مشکلات آئیں ان پر صبر کریں۔
حکیم لقمان کی چند دیگر نصیحتیں آداب معاشرت کے متعلق
حکیم لقمان اپنے بیٹے کو نصیحت کرتے ہوئے فرماتے ہیں: لوگوں کے سامنے (تکبر سے ) اپنے گال مت پھلاؤ۔ یعنی لوگوں سے ملاقات اور ان سے گفت گو کے وقت ان سے منھ پھیر کر گفت گو نہ کرو، جو ان سے اعراض کرنے اور تکبر کرنے کی علامت اور اخلاق شریفانہ کے خلاف ہے۔ اللہ تعالیٰ اپنے نبی صلی الله علیہ وسلم کے متعلق قرآن کریم سورة القلم کی آیت:4 میں ارشاد فرماتا ہے۔ یقینا تم اخلاق کے اعلیٰ درجہ پر ہو۔ حضرت عائشہ رضی اللہ عنہا سے جب آپ صلی الله علیہ وسلم کے اخلاق کے متعلق سوال کیا گیا تو حضرت عائشہ نے فرمایا:آپ صلی الله علیہ وسلم کا اخلاق قرآنی تعلیمات کے عین مطابق تھا۔ ( صحیح بخاری وصحیح مسلم ) حضور ا کرم صلی الله علیہ وسلم نے ارشاد فرمایا:مجھے بہترین اخلاق کی تکمیل کے لیے بھیجا کیا گیا ہے۔ (مسند احمد)
غرضیکہ حکیم لقمان کی اپنے بیٹے کو کی گئی قیمتی نصیحت کو اللہ تعالیٰ نے قرآن کریم میں ذکر کر کے پوری انسانیت کو یہ پیغام دیا کہ ہمیں تمام انسانوں کے ساتھ اچھے اخلاق پیش کرنے چاہییں۔ نیز رسول اللہ صلی الله علیہ وسلم نے ارشاد فرمایا: جو بندہ درگزر کرتا ہے اللہ تعالیٰ اس کی عزت بڑھاتا ہے اور جو بندہ اللہ کے لیے عاجزی اختیار کرتا ہے اللہ تعالیٰ اس کا درجہ بلند کرتا ہے۔ (صحیح مسلم )
حکیم لقمان اپنے بیٹے کو نصیحت کرتے ہوئے فرماتے ہیں: زمین پر اتراتے ہوئے مت چلو۔ یعنی زمین کو اللہ تعالیٰ نے سارے عناصر سے پست افتادہ بنایا ہے، تم اس سے پیدا ہوئے ، اس پر چلتے پھرتے ہو، اپنی حقیقت کو پہچانو، اِترا کر نہ چلو،جو متکبرین کاطریقہ ہے ۔اس کے بعد اللہ تعالیٰ فرماتا ہے:یقین جانو الله کسی اِترانے والے شیخی باز کو پسند نہیں کرتا ۔ حضور صلی الله علیہ وسلم نے ارشاد فرمایا:جس شخص کے دل میں ذرہ برابر بھی تکبر ہوگا وہ جنت میں نہیں جائے گا۔ ایک شخص نے عرض کیا یا رسول اللہ!آدمی چاہتا ہے کہ اس کا لباس اچھا ہو اور اس کا جو تا عمدہ ہو۔ آپ صلی الله علیہ وسلم نے فرمایا اللہ تعالیٰ جمیل ہے، جمال کو پسند کرتا ہے۔ کبر اور غرور تو حق کو ناحق کرنا اور لوگوں کو حقیر سمجھنا ہے۔ (مسلم ،کتاب الایمان،باب تحریم الکبر ) یعنی اپنی وسعت کے مطابق اچھا لباس پہننا کبر اور غرور نہیں، بلکہ لوگوں کو حقیر سمجھنا تکبر اور غرور ہے۔
حکیم لقمان اپنے بیٹے کو نصیحت کرتے ہوئے فرماتے ہیں:اور اپنی چال میں میانہ روی اختیار کرو۔ یعنی انسان کو درمیانی رفتار سے چلنا چاہیے ، رفتار نہ اتنی تیز ہو کہ بھاگنے کے قریب پہنچ جائے اور نہ اتنی آہستہ کہ سستی میں داخل ہو جائے ۔ یہاں تک کہ اگر کوئی شخص جماعت کی نماز کو حاصل کرنے کے لیے جار ہا ہو تو اس کو بھی حضور اکرم صلی الله علیہ وسلم نے بھاگنے سے منع فرما کر ،اطمینان وسکون کے ساتھ چلنے کی تاکید فرمائی ہے۔
حکیم لقمان کی اپنے بیٹے کو ایک اور اہم نصیحت:اپنی آواز آہستہ رکھو۔ آہستہ آواز رکھنے سے مراد یہ نہیں کہ انسان اتنا آہستہ بولے کہ سننے والے کو دقت پیش آئے، بلکہ مراد یہ ہے کہ جن کو سنانا مقصود ہے، ان تک تو آواز وضاحت کے ساتھ پہنچ جائے ،لیکن اس سے زیادہ چیخ چیخ کر بولنا اسلامی آداب کے خلاف ہے۔
غرضیکہ ہمیں اتنی ہی آواز بلند کرنی چاہیے جتنی اُس کے مخاطبوں کو سننے اور سمجھنے کے لیے ضروری ہے ۔ بے شک سب سے بری آواز گدھے کی آواز ہے۔
آخر میں آداب معاشرت سے متعلق چار نصیحتیں ذکر کی گئیں۔ اوّل لوگوں سے گفت گو اور ملاقات میں متکبرانہ انداز سے رخ پھیر کر بات کرنے سے منع کیا گیا۔ دوسرے زمین پر اکڑ کر چلنے سے منع کیا گیا۔ تیسرے درمیانی رفتار سے چلنے کی ہدایت دی گئی اور چوتھے بہت زور سے شور مچا کر بولنے سے منع کیا گیا۔ ان تمام ہی نصیحتوں کا خلاصہ یہ ہے کہ ہر وقت ہم دوسروں کا خیال رکھیں، کسی شخص کو بھی، خواہ وہ مسلمان ہو یا کافر ، ہم اس کو جانتے ہوں یا نہ جانتے ہوں، لیکن ہماری طرف سے کوئی تکلیف کسی بھی بشر کو نہیں پہنچنی چاہیے، مگر ہم ان امور میں کوتاہی سے کام لیتے ہیں، حالاں کہ ان امور کا تعلق حقوق العباد سے ہے اور حقوق العباد میں حق تلفی انسان کے بڑے بڑے نیک اعمال کو ختم کر دے گی ، لہٰذا ہمیں چاہیے کہ ہم حکیم لقمان رحمتہ اللہ علیہ کی ان قیمتی نصیحتوں پر عمل کر کے ایک اچھا معاشرہ تشکیل دیں۔