جامعہ فاروقیہ کراچی ۔۔ انٹرنیشنل اسلامک یونی ورسٹی

بیمار کی عیادت ایک انسانی حق،ایک اخلاقی فریضہ

مولانا عبدالرشید طلحہ نعمانی

خود غرضی ،مفادپرستی اورمادیت پسندی کے اس دور میں ہرطرف گہماگہمی اور نفسا نفسی کا عالم ہے ،میدان محشر کی منظر کشی کے حوالے سے جو باتیں قرآن و حدیث میں بہ کثرت ملتی ہیں، اس کی مختلف جھلکیاں آج کے اس مغرب زدہ ،انسانی اقدار سے عاری اور انسانیت سے خالی زمانے میں بھی جگہ جگہ دیکھی جاسکتی ہیں۔کہنے کو تو یہ ایک ترقی یافتہ دور ہے؛ مگردیکھاجائے تو یہاں کائنات کا ہرشخص، اپنی دنیا میں مست،اپنے نظام کار میں مگن،رشتہ داروں،پڑوسیوں اور دوست واحباب سے لاتعلق ،معاشرتی حقوق کی ادائیگی سے یکسر غافل اور اجتماعی ذمہ داریوں سے کوسوں دور ہے ۔یہ شکایت نہیں، حقیقت ہے کہ جو انسان خودی سے خدا تک نہیں پہنچ سکا وہ خلق سے خالق تک کیسے پہنچ پائے گا؟؟

اسلام دینِ الفت و انسیت ہے ؛جس میں انفرادی زندگی کے ساتھ ساتھ اجتماعی زندگی کے حوالے سے بھی زریں اصول اور بے نظیر احکام بیان کیے گئے ہیں ،من جملہ ان میں’ عیادت اور بیمار پرسی ‘بھی ہے ۔اس فراموش کردہ عظیم سنت اور اہم ترین عبادت کی فضیلت و اہمیت اجاگر کی جائے، تاکہ ہم بھی دوسروں کا دکھ درد اپنے سینوں میں محسوس کریں اور انہیں دیکھ کر اللہ کی بے پناہ نعمتوں کا شکر بجالانے کی توفیق ملتی رہے ۔

عیادت کے فضائل و احکام
عیادت کے معنی مطلقزیارت کے آتے ہیں؛لیکن اس کا مشہور اِستعمال زیارة المریضیعنی مریض کی زیارت کرنے کے معنی میں ہوتا ہے ۔(الموسوعة الفقہیة الکویتیة:31/76)مریض کی عیادت کا کیا حکم ہے؟ اس بارے میں فقہائے امت کے متعدد اقوال ہیں :سنّت۔ مندوب۔ واجب۔ سنّت علی الکفایة۔ فرض علی الکفایة۔راجح یہ ہے کہ اگر کوئی دیکھ بھال کرنے والا ہو تب تو سنت ہے، ورنہ واجب ہے ۔ (مرقاة : 3/1120)شارح بخاری علّامہ ابن حجر عسقلانیفرماتے ہیں: عیادت کا حکم اصل میں تو مستحب ہونے کا ہے ؛لیکن بعض اوقات بعض لوگوں کے لیے وجوب کے درجہ میں پہنچ جاتا ہے ۔(فتح الباری)

ایک مسلمان کے لیے دوسرے مسلمان کی عیادت کرناتو اسلام کا حق ہے ؛مگر اس سے آگے بڑھ کر انسانیت کی بنیاد پربلاتفریق مذہب و ملت غیرمسلم کی مزاج پرسی بھی اجر و ثواب سے خالی نہیں، اگراس میں تبلیغ اسلام کی نیت کرلی جائے تو پھرنور علی نور۔روایات میں ہے کہ رسول الله صلی الله علیہ وسلم بھی ایک غیرمسلم یہودی لڑکے کی خبر گیری اور عیادت کے لیے تشریف لے گئے اور اس کو اسلام کی دعوت دی اوروہ لڑکا آپ صلی الله علیہ وسلم کی خوش خلقی سے متاثر ہوکر آپ کی بے لوث دعوت کے نتیجے میں مسلمان ہوگیا۔ (بخاری شریف)اسی طرح نبی اکرم صلی الله علیہ وسلم اپنے چچا ابوطالب کی بیمار پرسی اور دعوت ایمان کے لیے بھی تشریف لے جاتے تھے۔ (بخاری شریف)

کسی بھی بیمار کی عیادت کوخود اللہ تعالیٰ کی عیادت کے مترادف بتلایاگیا،اللہ تعالیٰ کی ذات اگرچہ ہر بیماری سے پاک ہے ،اُسے کوئی بیماری وتکلیف ہر گز ہرگز لاحق نہیں ہوسکتی؛لیکن عیادت کی فضیلت اجاگرکرنے کے لیے اس طرح مثال بیان کی گئی ،چناں چہ حدیثِ قدسی میں ہے ،حضرت ابوہریرہ رضی اللہ عنہ روایت کرتے ہیں کہ رسول اللہ صلی الله علیہ وسلم نے فرمایا اللہ عزوجل قیامت کے دن فرمائے گا:اے ابن آدم! میں بیمار ہوا اور تو نے میری عیادت نہیں کی؟!وہ کہے گا :اے پروردگار! میں تیری عیادت کیسے کرتا حالانکہ تو تو رب العالمین ہے؟! اللہ فرمائے گا کیا تو نہیں جانتا کہ میرا فلاں بندہ بیمار تھا اور تو نے اس کی عیادت نہیں کی، کیا تو نہیں جانتا کہ اگر تو اس کی عیادت کرتا تو تو مجھے اس کے پاس پاتا؟اے ابن آدم! میں نے تجھ سے کھانا مانگا؛لیکن تو نے مجھے کھانا نہیں کھلایا؟!وہ کہے گا اے پروردگار! میں تجھے کیسے کھانا کھلاتا حالانکہ تو تو رب العالمین ہے؟! تو اللہ فرمائے گا:کیا تو نہیں جانتا کہ میرے فلاں بندے نے تجھ سے کھانا مانگا تھا؛لیکن تو نے اس کو کھانا نہیں کھلایا،کیا تو نہیں جانتا کہ اگر تو اس کو کھانا کھلاتا تو تو مجھے اس کے پاس پاتا؟اے ابن آدم! میں نے تجھ سے پانی مانگا ؛لیکن تو نے مجھے پانی نہیں پلایا؟وہ کہے گا:اے پروردگار!میں تجھے کیسے پانی پلاتا حالانکہ تو تو رب العالمین ہے! اللہ تعالیٰ فرمائے گا :میرے فلاں بندے نے تجھ سے پانی مانگا تھا؛لیکن تونے اس کو پانی نہیں پلایا ،اگر تو اسے پانی پلاتا تو تو اسے میرے پاس پاتا۔(مسلم شریف)

ایک اور روایت میں حضرت ثوبان رضی اللہ عنہ، جونبی کریم صلی الله علیہ وسلم کے آزاد کردہ غلام ہیں ،فرماتے ہیں کہ نبی کریم صلی الله علیہ وسلم نے اِرشاد فرمایا: بے شک مسلمان جب اپنے کسی مسلمان بھائی کی عیادت کرتا ہے تو وہ مستقل جنّت کی میوہ خوری میں مصروف رہتا ہے، یہاں تک کہ وہ عیادت سے واپس آجائے ۔ (مسلم شریف)

مزاج پرسی کی فضیلت بیان کرتے ہوئے ایک مقام پر رسول اللہ صلی الله علیہ وسلم نے یوں ارشاد فرمایا :ایک مسلمان دوسرے مسلمان کی عیادت کے لیے اگر صبح کے وقت جائے تو شام تک اور شام کو جائے تو صبح تک ستر ہزار فرشتے اُس کے لیے رحمت کی دعا کرتے ہیں اور جنت میں اُس کے لیے ایک باغ مقرر ہوجاتا ہے ۔(ترمذی شریف)

اسی طرح حضرت ابوہریرہ رضی اللہ عنہ نبی کریم صلی الله علیہ وسلم کا یہ اِرشادنقل فرماتے ہیں: جب کوئی شخص اپنے کسی بھائی کی عیادت کرتا ہے یا اپنے دینی بھائی کی زیارت کرتا ہے، یعنی ملنے کے لیے جاتا ہے تو اللہ تعالیٰ اِرشاد فرماتے ہیں:تم (دنیاو آخرت میں)خوش رہواور بہت اچھا رہے تمہارا چلنا اور تمہیں جنت میں ایک بڑا درجہ اور مرتبہ حاصل ہو۔ (ترمذی شریف) نیزحضرت ابوامامہ رضی اللہ عنہ فرماتے ہیں کہ نبی کریم صلی الله علیہ وسلم نے اِرشاد فرمایا:جوکسی مریض کی عیادت کرے اور اُس کے پاس بیٹھ جائے توجب تک وہ اُس کے پاس بیٹھے ،رحمتِ الٰہی اُس کو ہر جانب سے گھیر لیتی ہے اور جب وہ اُس کے پاس سے اٹھ کر چلا جاتا ہے تو اللہ تعالیٰ اُس کے لیے ایک دن کے روزے کا اجرلکھ دیتے ہیں۔(کنزالعمال)

بیمار پرسی کے آداب
جس طرح ہر عبادت کے کچھ ادب آداب ہوتے ہیں ،دین اسلام میں عیادت کے بھی مستقل آداب بتلائے گئے ہیں ،فی زماننا بہت سے حضرات کو عیادت کے آداب کا علم نہیں ہوتا، نتیجہ یہ ہوتا ہے کہ وہ بیمار کو تسلی دینے اور آرام پہنچانے کے بجائے اس کی تکلیف کا سبب بن جاتے ہیں، آنحضرت صلی الله علیہ وسلم نے اپنے قول و عمل کے ذریعہ تیمارداری کے آداب بھی امت کوسکھائے ہیں، ہر مسلمان کو ان کی رعایت کرنی چاہیے ۔

(الف)سب سے پہلے دعا پڑھی جائے اور خیروبھلائی کی بات کی جائے : حضرت عائشہ فرماتی ہیں کہ آنحضرت صلی الله علیہ وسلم کا معمول تھا کہ جب کوئی شخص بیمار ہوتا تو آپ صلی الله علیہ وسلم اپنے داہنے ہاتھ سے اسے چھوتے اور یہ دعا پڑھتے :”اَذْھبِ الْباْسَ رَبَّ النَّاسِ، وَ اشْفِ اَنْتَ الشَّافِی لَا شِفَاءَ الا شِفَائُکَ شِفَاءً لَا یُغَادِرُ سُقْمًا…“ (بخاری ومسلم)

اور حضرت ام سلمہ رضی اللہ عنہا سے روایت ہے کہ رسول صلی اللہ علیہ وسلم نے فرمایا: بیمار یا میت کے گھر جاؤ تو اچھی باتیں کہو، اس لیے کہ فرشتے اس پر آمین کہتے ہیں جو تم کہتے ہو۔

اسی طرح حضرت عبد اللہ بن مسعود رضی اللہ عنہ بیان کرتے ہیں کہ ایک مرتبہ میں نبی کریم صلی اللہ علیہ وسلم کے پاس گیا ، اس وقت آپ بخار میں مبتلا تھے ۔ میں نے کہا: اے اللہ کے رسول( صلی اللہ علیہ وسلم) ! اس وقت آپ کو شدید بخار ہے ۔ آپ صلی اللہ علیہ وسلم نے فرمایا: ہاں! تم ٹھیک کہتے ہو، مجھے تم میں سے دو آدمیوں کے برابر بخا ر ہوتا ہے ۔ میں نے کہا: کیا ایسا اس لیے ہوتا ہے کہ آپ کے لیے دوہرا اجر ہے ؟ آپ نے فرمایا: ہاں! مسلمان کو مرض یا کسی اوروجہ سے جب بھی کوئی تکلیف پہنچتی ہے تو اللہ اس کے بدلے اس کے گناہوں کو مٹادیتا ہے ،جس طرح درخت اپنے پتے کو گرادیتا ہے ۔ (صحیح بخاری،کتاب المرضیٰ)

(ب)مریض کے پاس کم بیٹھنا:حضرت عبداللہ بن عباس فرماتے ہیں کہ عیادت کی سنت یہ ہے کہ مریض کے پاس تھوڑی دیر بیٹھا جائے اور شور کم کیا جائے ۔(مشکوٰة المصابیح)

نیزآنحضرت صلی الله علیہ وسلم نے فرمایا کہ”العیادة فواق ناقة“یعنی بیمار کی عیادت بس اتنی دیر ہونا چاہیے جتنی دیر اونٹنی کو دومرتبہ دوہنے کے درمیانی وقفے میں لگتی ہے ۔ (یعنی تھوڑی سی دیر) اسی طرح حضرت سعید ابن المسیب نے فرمایا کہ ”افضل ترین عیادت وہ ہے جس میں بیمار پرسی کرنے والا جلدی اٹھ کر چلاجائے“ ۔ (مشکوٰة بحوالہ بیہقی)ان روایات کی روشنی میں علماء نے اس کی بڑی تاکید فرمائی ہے کہ عیادت کرنے والا بیمار کے پاس زیادہ دیر نہ بیٹھے، جس سے بیمارکو زحمت ہو۔ملا علی قاری نے بعض حضرات سے نقل کیا ہے کہ ایک مرتبہ ہم مشہور صوفی بزرگ سری سقطی کی عیادت کو گئے اور دیر تک بیٹھے رہے ۔وہ پیٹ کے درد سے بے چین ہورہے تھے اور ہم اٹھتے نہ تھے تو بالآخر ہم نے ان سے کہا کہ:”ہمارے لیے دعا فرمایئے تو ہم چلیں“۔اس پر حضرت سری سقطی نے دعا فرمائی کہ ”یاالله انہیں بیماروں کی عیادت کا طریقہ سکھا دیجیے“۔

(ج)عیادت صرف اللہ کی رضا کے لیے کرنا: عیادت بلکہ ہر عمل کا طریقہ یہ ہے کہ اُس کو صرف اللہ کی رضا کے لیے کیا جائے ،نفسانی اغراض اور دنیاوی مصالح یا نام و نمود اور دکھلاوا ہر گز پیش نظر نہیں رکھنا چاہیے ؛کیوں کہ یہ عمل کو ضائع کرنے کے مترادف ہے ۔نبی کریم صلی الله علیہ وسلم کا اِرشاد ہے: اللہ تعالیٰ اُس پر رحم فرمائے جو صبح کی نماز پڑھ کر اللہ کی رضاء و خوش نودی اور آخرت کے (بہترین انجام اور ثواب)کے حصول کے لیے کسی مریض کی عیادت کرنے کے لیے جائے تو اللہ تعالیٰ اُس کے لیے ہر قدم کے بدلے ایک نیکی لکھ دیتے ہیں،ایک گناہ معاف کردیتے ہیں اور جب وہ مریض کے پاس بیٹھتا ہے تو اجر و ثواب (کے سمندر)میں غرق ہوجاتا ہے ۔(شعب الایمان)

(د)مریض کو اُس کی پسندیدہ غذا کھلانا،جب کہ اُس کے لیے وہ نقصان دہ نہ ہو: بیماری کی حالت میں منھ کا ذائقہ عموماً بدل جاتا ہے اور بعض اوقات اِسی کیفیت میں مریض کا دل کسی خاص چیز کے کھانے کا کررہا ہوتا ہے، ایسے میں دیکھنا چاہیے کہ اگر وہ وہ چیز مریض کے لیے نقصان دہ نہ ہو اور معالج کی طرف سے اُس کا پرہیز نہ بتایا گیا ہو تو مریض کو منع نہیں کرنا چاہیے ،بلکہ کوشش کرکے کہیں سے بھی اُسے حاصل کرکے مریض کو کھلانا چاہیے ،نبی کریم صلی الله علیہ وسلم نے اِس کی تعلیم دی ہے :حضرت سلمان نبی کریم صلی الله علیہ وسلم کایہ اِرشاد نقل فرماتے ہیں : جس نے مریض کو وہ چیز کھلائی جس کی اُسے خواہش تھی ،اللہ تعالیٰ اُسے جنّت کے پھل کھلائیں گے ۔(طبرانی کبیر)

حضرت عبد اللہ بن عباس سے مروی ہے کہ نبی کریم صلی الله علیہ وسلم نے کسی شخص کی عیادت کی ،آپ نے اُس سے پوچھا کہ تمہیں کس چیز کی خواہش ہے ؟ اُس سے کہا میں گندم کی روٹی کھانا چاہتا ہوں،آپ صلی الله علیہ وسلم نے لوگوں سے اِرشاد فرمایا:جس کے پاس گندم کی روٹی ہو اُسے چاہیے کہ اپنے بھائی کے لیے بھیج دے ،پھر آپ صلی الله علیہ وسلم نے فرمایا: جب تم میں سے کسی کا مریض کسی چیز کے کھانے کی خواہش کرے تو اُسے کھلادینا چاہیے۔(ابن ماجہ)

صحابہ کا ذوق عیادت
ہر وہ شخص جوکبھی بیماری اور پریشانی سے دوچار ہو اہووہ یہ بات بہ خوبی جانتا ہے کہ مریض ہمیشہ اس بات کا طلب گار رہتا ہے کہ اس کی دل جوئی کی جائے ، کوئی ہو جو اس کے پاس آ کر بیٹھے ، اس سے باتیں کرے ، اس کا حال پوچھے ، اس کی تیمار داری کرے ۔ سیدنا قیس بن سعد بن عبادہ بڑے مشہور صحابی ہیں، ان کا گھرانہ بڑا سخی تھا، اللہ نے انہیں خوب نوازاتھا۔ بنو خزرج کے اس سردارابن سردار سے بہت سے لوگ قرض لے جاتے تھے ۔ ضرورت مند لوگ قرض لے تو لیتے ہیں؛ مگر اس کی واپسی اتنی آسان نہیں ہوتی ۔ ایک مرتبہ قیس بیمار ہو گئے ۔ اب وہ اس انتظار میں ہیں کہ لوگ ان کی تیمار داری کے لیے آئیں؛مگر بنو خزرج کے اس سردار کا گھر مہمانوں سے خالی ہے ۔ بیوی سے پوچھا: میں بیمار ہوں۔ کیا وجہ ہے کہ لوگ میری تیمار داری کے لیے نہیں آئے؟! بیوی کہنے لگی: آپ کو معلوم ہے کہ مدینہ کے اکثر لوگوں نے آپ سے قرض لے رکھا ہے ، ان کے وعدے گزر چکے ہیں، مگر وہ قرض واپس نہیں کر سکے ۔ وہ آپ سے شرمندہ ہیں اور آپ کا سامنا کرنے سے کترارہے ہیں۔قیس کہنے لگے : اچھا! تو یہ بات ہے کہ لوگ قرض واپس نہ کرسکنے کی وجہ سے میری تیمار داری کے لیے نہیں آئے ۔ کہنے لگے : برا ہو ایسے مال کا! جو لوگوں کو میری تیمار داری سے روک رہا ہے ۔ منادی کرنے والے کو بلایا۔ اس سے کہا: جاوٴ !مدینہ کے بازاروں میں اعلان کر دو کہ جو کوئی قیس بن سعد کا مقروض ہے ، قیس کی طرف سے اعلان ہے کہ ا س کا قرض معاف کیا جا تا ہے ۔اعلان کرنے کی دیر تھی کہ لوگ اتنی کثرت سے ان کے گھر تیمار داری کے لیے آتے گئے کہ گھر کے دروازے کی دہلیز ٹوٹنے کے قریب ہوگئی۔

اسی طرح ایک دن اللہ کے رسول صلی الله علیہ وسلم نے فرمایا: تم میں سے کون ایسا شخص ہے جس نے آج روزہ رکھا ہوا ہے ؟ سیدنا ابو بکر صدیق نے عرض کیا: اللہ کے رسول (صلی الله علیہ وسلم )! میں نے آج روزہ رکھا ہوا ہے۔ آپ صلی الله علیہ وسلم نے پوچھا :آج تم میں سے کس نے کسی مسلمان بھائی کا جنازہ پڑھا ہے ؟سیدنا ابوبکر صدیق نے کہا: اللہ کے رسول( صلی الله علیہ وسلم) ! میں نے جنازہ پڑھا ہے ۔ارشاد ہوا : آج تم میں سے کس نے مسکین کو کھانا کھلایا ہے ؟ ابوبکر صدیق عرض کرنے لگے : اللہ کے رسول (صلی الله علیہ وسلم) ! میں نے آج مسکین کو کھانا کھلایا ہے ۔ آپ صلی الله علیہ وسلم نے پوچھا کہ آج تم میں سے کس نے مریض کی عیادت کی ہے ؟ ابوبکر صدیق عرض کرتے ہیں: اللہ کے رسول (صلی الله علیہ وسلم) !میں نے آج مریض کی عیادت کی ہے ۔ آپ صلی الله علیہ وسلم اپنی زبان اقدس سے یہ الفاظ ارشاد فرماتے ہیں: ”جس شخص میں یہ ساری خوبیاں جمع ہوجائیں وہ یقینا جنت میں جائے گا“۔(رواہ مسلم)۔

ذرا غور کیجیے ! ان خوبیوں میں سوائے روزے کے باقی ساری خوبیاں اخلاق حسنہ اور دوسروں سے حسن سلوک کی نشان دہی کرتی ہیں۔

ہماری حالت زار
آج کل ہمارے معاشرہ میں جملہ معاشرتی حقوق ایک رسم بن کے رہ گئے ہیں۔ اگر کوئی بیمار ہوجائے تو ا س کی عیادت کے لیے جانا بھی دردسر سمجھاجاتا ہے اور یوں کہاجاتاہے کہ”فلاں کو دیکھنے بھی جانا ہے ، دو دن ہوگئے وہ بیمار ہے ، وہ کہے گا کہ میں اس کو دیکھنے بھی نہیں آیا۔“ مریض کی عیادت کو نیک کام نہیں؛بلکہ ایک بوجھ سمجھ کر کیا جاتا ہے ،حالاں کہ یہ ایک انسانی حق ہے، اس کی ادائیگی میں ایثار اور خندہ پیشانی کا مظاہرہ ہونا چاہیے۔ آج اجتماعی اور انفرادی دونوں طریقوں سے تیمارداری کی اس سنت کو زندہ کرنے کی اشد ضرورت ہے ۔قابل مبارک باد ہیں وہ دینی اور رفاہی تنظیمیں جو اس حوالے سے سرگرم عمل ہیں؛مگر ان ہی پر اکتفا کرنا ٹھیک نہیں؛ بلکہ حالات کے تقاضوں کو سمجھتے ہوئے اسلام کا پیغام انسانیت لوگوں تک پہنچانا ہی وقت کی سب سے بڑی ضرورت ہے ۔اللہ پاک ہمیں اس عظیم عبادت میں حصہ لیتے رہنے اور بہ قدر وسعت اس کو وقتاً فوقتاً انجام دینے کی توفیق عطا فرمائے ۔ آمین !



English
عربي

ابتداء
اپنے بارے میں
جامعہ فاروقیہ
الفاروق
اسلام
قرآن
کتب خانہ
منتحب سائٹس
This site is developed under the guidance of eminent Ulamaa of Islam. 
Suggestions, comments and queries are welcomed at info@farooqia.com
ابتداء  |  اپنے بارے میں  |  جامعہ فاروقیہ  |  الفاروق  |  اسلام  |  قرآن  |  کتب خانہ  |  منتخب سائٹس
No Copyright Notice.
All the material appearing on this web site can be freely distributed for non-commercial purposes. However, acknowledgement will be appreciated.