جامعہ فاروقیہ کراچی ۔۔ انٹرنیشنل اسلامک یونی ورسٹی

مبصر کے قلم سے

ادارہ

تبصرہ کے لیے کتاب کے دو نسخے ارسال کرنا ضروری ہے۔ صرف ایک کتاب کی ترسیل پر ادارہ تبصرے سے قاصر ہے۔ تبصرے کے لیے کتابیں صرف مدیر الفاروق یا ناظم شعبہ الفاروق کو بھیجی جائیں (ادارہ)

فاران ریڈیائی تقریریں
یہ کتابچہ مولانا کبیر الدین فاران مظاہری کی ان تقاریر کا مجموعہ ہے جو آل انڈیا ریڈیو کے مختلف اسٹیشنوں سے اسلامی تقریبات، اخلاقیات اور معاشرتی واجتماعی موضوعات پر نشر کی گئیں۔ ان تقریروں میں شستہ وسلیس زبان، شائستہ وبلیغ طرز بیان اور جاذب وپرکشش اسلوب اختیار کیا گیا ہے اور مولانا کبیر الدین فاران نے اپنے اس مجموعے کے متعلق ان الفاظ میں اظہار خیال کیا ہے :
”مجھے اعتراف ہے کہ اس میں لب ولہجہ میں یکسانیت، زجر وتوبیخ کی شوکت، تنقید وملامت کی تمکنت، پندونصائح کی حلاوت اور دلائل وبراہین کی متانت پیدا نہ کر سکا لیکن ملت کے لیے دردو سوز، حکمت وعبرت، برہان ووجدان، علم وحقائق، موعظت ومعرفت کی جستجو اور بدلتے ذوق کے لیے ادب وانشاء کی چاشنی پیدا کرنے کی کوشش کی گئی ہے ۔“

اس مجموعے کی چند اہم تقریروں کے عنوان درج ذیل ہیں، ” محسن اعظم صلی الله علیہ وسلم“، ”آیانہ کوئی رحمت عالم بن کر “، ”دونوں جہاں کی بھلائی“، ” محمد رحمة للعالمین ہیں“ ، ”ارکان اسلام“،” روزہ اور اس کے مقاصد “،” پاون پرو عید الفطر“ ،”عید الاضحی کا پیغام“، ”داستان کربلا“،” مذہب او رانسان“، عدل وانصاف“ ،”سکون کی تلاش“۔

تقاریر کے اس مجموعے کو کارڈ ٹائٹل کے ساتھ چھوٹے سائز کے 136 صفحات پر مظہر بک ڈپو ناظم آباد نمبر3، کراچی سے شائع کیا گیا ہے۔

شرح سنن النسائی (جلددوم)
تالیف: مولانا خلیل الرحمن
سائز:20x30=8 صفحات:632
ناشر: زمزم پبلشرز، اردو بازار کراچی
”سنن نسائی“ کا شمار حدیث کی ان چھ معروف کتابوں میں ہوتا ہے جنہیں ”صحاح ستہ“ کہا جاتا ہے اور درس نظامی کے نصاب میں ”صحاح ستہ“ کی دیگر کتابوں کی طرح ”سنن نسائی“ بھی داخل ہے اور اسے درس نظامی کے آخری سال دورہ حدیث میں پڑھایا جاتا ہے ۔ زیر نظر کتاب” سنن نسائی“ کا ترجمہ وتشریح ہے اور اسے دارالعلوم ٹنڈوالہ یار کے صدر مدرس مولانا خلیل الرحمن قطبی نے مرتب فرمایا ہے۔ اس وقت ہمارے سامنے اس کی دوسری جلد ہے اور اس میں اسلوب یہ اختیار کیا گیا ہے کہ پہلے باب کی ہر حدیث کے تحت اس کا ترجمہ ذکر کیا جاتا ہے اور پھر آخر میں ”تشریح“ کے عنوان سے ان احادیث سے متعلق شرح اور فقہی مباحث کو بیان کیا جاتا ہے ، جس میں کتابوں کے حوالے کا اہتمام بھی کیا گیا ہے ، البتہ بعض جگہ کتاب کے ساتھ ساتھ جلد وصفحہ کا حوالہ بھی دیا جاتا ہے او رکہیں صرف کتاب کا نام لکھنے پر اکتفا کیا گیا ہے۔”سنن نسائی“ کی شرح کی یہ دوسری جلد ”کتاب الصلاة“ کے کچھ حصے کے ساتھ ” کتاب الأذان“ ”کتاب المساجد“ ،” کتاب القبلة“، ”کتاب الإمامة“ ،” کتاب الافتتاح“، ”باب سجود القرآن“ اور ”کتاب السہو“ کی احادیث کے ترجمہ وتشریح پر مشتمل ہے ۔ اردو زبان میں ”سنن نسائی“ کے کئی ترجمے منظر عام پر آچکے ہیں لیکن احادیث کے ترجموں کے ساتھ ساتھ ان سے متعلق فقہی مباحث اور تشریح کے حوالے سے یہ ایک عمدہ اور قابل ستائش کاوش ہے۔

عرض مؤلف میں کہا گیا ہے کہ شرح کی اس دوسری جلد کو پہلے کسی اور مکتبہ سے شائع کیا گیا تھا او راس میں پروف ریڈنگ کی اغلاط حد سے زیادہ تھیں اور خود مرتب سے بھی بعض جگہ سہو ہو گئے تھے، اب انہیں صحیح کرکے نیا ایڈیشن زمزم پبلشرز کراچی سے شائع کیا جارہا ہے۔ اس ایڈیشن میں بھی اگرچہ کافی حد تک پروف کی تصحیح کی گئی ہے لیکن کتاب کے مطالعے سے اندازہ ہوتا ہے کہ اس میں اب بھی مزید تصحیح کی گنجائش موجود ہے اور آئندہ ایڈیشن کو نظر ثانی کے بعد ہی شائع کرنا چاہیے۔یہ کتاب متوسط کاغذ وطباعت کے ساتھ زمزم پبلشرز کراچی سے شائع ہوئی ہے۔

شرح ریاض الصالحین
تالیف: مولانا محمد الیاس بارہ بنکوی
صفحات:800 سائز:20x30=8
ناشر: زمزم پبلشرز اردو بازار، کراچی
”ریاض الصالحین“ احادیث نبوی کا وہ عظیم الشان مجموعہ ہے جس میں امام نووی رحمة الله علیہ نے ظاہری وباطنی آداب ، ترغیب وترہیب کے مضامین، زہد وریاضت نفس ، تہذیب اخلاق، طہارت قلوب او راعضاء وجوارح کی حفاظت سے متعلق حدیث کی صحیح ومعروف کتابوں سے روایات کو جمع کیا ہے اور ہر باب کو قرآنی آیات سے شروع کیا گیا ہے ۔ امام نووی رحمة الله علیہ کے جمع کردہ احادیث کے اس مجموعے کو الله تعالیٰ نے عوام وخواص میں مقبولیت بخشی اور مدارس وجامعات کے نصاب کا حصہ ہونے کے ساتھ دعوت وتبلیغ کے حلقوں میں بھی اس کی تعلیم ہوتی ہے او رتہذہب اخلاق کے حوالے سے عوام وخواص سب اس سے خوب استفادہ کرتے چلے آرہے ہیں ۔ چناں چہ کتاب کی اہمیت و افادیت کے پیش نظر علماء نے اس کی توضیح وتشریح کا کام کیا او راس کی کئی شروح و حواشی لکھے گئے۔ زیر نظر شرح بھی انہیں کاوشوں کا ایک حصہ ہے او راسے مدرسہ کاشف العلوم بنگلہ والی مسجد دہلی کے استاذ حدیث مولانا مولانا الیاس بارہ بنکوی نے مرتب کیا ہے اور اس میں انہوں نے علامات ترقیم کا خیال رکھتے ہوئے آیات واحادیث پر اعراب لگائے ہیں ، قرآنی آیات کی تخریج کے ساتھ جہاں ضرورت تھی احادیث کی تخریج بھی کی ہے، قرآن مجید کے الفاظ مفردہ اور احادیث کے مشکل وغریب الفاظ کی لغوی شرح بھی کی ہے اور سلف صالحین کی معتبر ومستند کتابوں سے احادیث کے فوائد کی طرف راہ نمائی بھی کی ہے ، جو کتاب لکھنے کا اصل مقصد وموضوع ہے کہ نبی اکرم صلی الله علیہ وسلم نے احادیث کے ذریعے دنیا وآخرت کی جن کام یابیوں وکامر انیوں کی طرف امت کی راہ نمائی کی تھی انہیں سمجھ کر ان پرعمل کیا جاسکے ۔ کتاب کی پروف ریڈنگ او رتصحیح میں محنت وکوشش کی گئی ہے اور اس میں مولانا محمد رابع ندوی اور مولانا سعید الرحمن اعظمی کی تقاریظ بھی شامل کی گئی ہیں۔کتاب ادنیٰ کاغذ پر مضبوط جلد بندی کے ساتھ زمزم پبلشرز کراچی سے شائع کی گئی ہے۔

إتمام الصحیفہ فی توضیح علم الصیغہ
تالیف: مفتی عنایت احمد، ترجمہ: عبدالوحید ملک عبدالحق
صفحات:210 سائز:20x30=8
ناشر: زمزم پبلشرز، نزد مقدس مسجد، اردو بازار ، کراچی
مولانا مفتی عنایت احمد کاکوروی رحمة الله علیہ نے 1857ء کی جنگ آزادی میں انگریزوں کے خلاف مجاہدین اور مسلمانوں کی اعانت کا فتوی دیا تھا۔ اس جہاد آزادی کی پاداش میں انگریزوں نے دیگر کئی علماء ومجاہدین کی طرح انہیں بھی گرفتار کرکے جزیرہ ”انڈومان“ کی طرف جلد وطن کرکے قید کر دیا، وہیں دوران قید انہوں نے بعض کتابیں تالیف کیں، جن میں فن صرف کی کتاب” علم الصیغہ“ بھی تھی۔ اس کتاب کی اصل زبان فارسی تھی لیکن اب چوں کہ فارسی زبان سے روز افزوں دوری بڑھتی جارہی ہے اور پاکستان وہندوستان کے دینی اداروں نے اپنے ہاں عربی معاہد بھی کھول لیے ہیں، لہٰذا فارسی کتابوں کی تعریب کا کام شروع ہوا تو ہندوستان وپاکستان میں ”علم الصیغہ“ کے بھی کئی عربی ترجمے کیے گئے۔ ”إتمام الصحیفہ“ کے نام سے یہ کتاب بھی اسی سلسلے کی ایک کاوش ہے اور اس میں ترجمے کے ساتھ بعض دیگر امور کا بھی خیال رکھا گیا ہے کہ عبارت کو آسان وعام فہم بنانے کے لیے لفظی ترجمے سے احتراز کرکے سلیس ورواں ترجمے کی کوشش کی گئی ہے، جو گردانیں نامکمل تھیں یا ان کی طرف صرف حرکات سے اشارہ کیا گیا تھا انہیں مکمل کیا گیا ہے ، مشق وتمرین کے لیے مصادر بھی دیے گئے ہیں اور ہر باب کے ساتھ اس کی خصوصیات کو بھی ذکر کیا گیا ہے ۔ ابواب کی تقدیم وتاخیر کے علاوہ دیگر تبدیلیاں اور حذف واضافے بھی کے گئے ہیں جن کا تذکرہ کتا ب کی ابتداء میں کر دیا گیا ہے ، اس لیے اس تعریب کا نام بھی ” إتمام الصحیفة فی توضیح علم الصیغہ“ رکھا گیا ۔ اس کاوش کا مقصد کتاب کی افادیت کو بڑھانا ہے کہ عربی زبان میں منتقل ہونے کے ساتھ کتاب جامع اور آسان بن جائے چناں چہ اپنی اس کاوش میں مترجم کام یاب رہے ہیں۔

کتاب کا ورق عمدہ ہے اور خوب صورت کارڈ ٹائٹل کے ساتھ زمزم پبلشرز کراچی سے شائع ہوئی ہے۔



English
عربي

ابتداء
اپنے بارے میں
جامعہ فاروقیہ
الفاروق
اسلام
قرآن
کتب خانہ
منتحب سائٹس
This site is developed under the guidance of eminent Ulamaa of Islam. 
Suggestions, comments and queries are welcomed at info@farooqia.com
ابتداء  |  اپنے بارے میں  |  جامعہ فاروقیہ  |  الفاروق  |  اسلام  |  قرآن  |  کتب خانہ  |  منتخب سائٹس
No Copyright Notice.
All the material appearing on this web site can be freely distributed for non-commercial purposes. However, acknowledgement will be appreciated.